Ndërsa të dhënat administrative, por dhe anketa e forcave të punës, tregojnë një rritje të ndjeshme të numrit të të punësuarve në vend në tremujorin e tretë, duket se është pikërisht bujqësia ajo që i ka dhënë hov punësimit në vend.
Nga rreth 18 mijë të punësuar më shumë në tremujorin e tretë, rreth 10 mijë prej tyre i përkasin bujqësisë. Sektori privat jo bujqësor ka shtuar rreth 7 mijë vende pune të reja, ndërsa ai shtetëror ka marrë më pak se një mijë të punësuar të rinj.
Në tabelën e INSTAT “Punësimi sipas burimeve administrative dhe sektori bujqësor raporton të dhënat administrative për të punësuarit në sektorin shtetëror dhe atë privat jo bujqësor (sipas raportimeve zyrtare te sigurimet), ndërsa për bujqësinë të dhënat merren nga Anketa e Forcave të Punës (vrojtimi në terren, ku njerëzit pyesin nëse kanë punuar apo jo).
Që prej tremujorit të fundit 2015, të punësuarit në bujqësi rezultojnë me rritje të ndjeshme.
Kjo rritje e punësimit në sektorin ku sigurojnë të ardhurat rreth 45% e të punësuarve në vend vjen në një kohë që bujqësia ka renë me rënie, të paktën në gjashtëmujorin e parë të vitit, sipas të dhënave zyrtare për prodhimin e brendshëm bruto të INSTAT. Sipas të dhënave më të fundit të INSTAT, që i referohen tremujorit të dytë 2016, sektori i bujqësisë është futur në një trend rënës për të pestin 3-mujor radhas. Aktiviteti i Bujqësisë, Pyjeve dhe Peshkimit në tremujorin e dytë të vitit 2016, krahasuar me të njëjtin tremujor të një viti më parë, pati rënie prej 1,48%. (Bujqësia futet në trend rënës, prodhimi bie për të pestin tremujor radhazi)
Por, si shpjegohet kjo kontradiktë në shifra. Angazhimi i shumë punonjësve në bujqësi me kultivimin e hashashit vlerësohet që të ketë rritur numrin e atyre që deklarojnë në anketim se kanë punuar muajt e fundit, duke përmirësuar treguesit e punësimit, ndërkohë që PBB zyrtare nuk arrin të masë këtë pjesë informale të bujqësisë.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
