Takimi i Ohrit, Kurti dhe Vuçiç bien dakord të zbatojnë marrëveshjen e Brukselit, Vuçiç nuk firmos por angazhohet

Përfundoi pas më shumë se 10 orësh takimi trepalësh mes kryeministrit të Kosovës, Albin Kurti dhe presidentit të Serbisë, Aleksandar Vuçiq, nën ndërmjetësim të zyrtarëve të Bashkimit Evropian, i cili u mbajt në Ohër.

Përfaqësuesi i lartë të Bashkimit Evropian për Politikë të Jashtme dhe Siguri, Josep Borrell ka informuar për rezultatin e arritur.

Gjatë një konference për media, Borrell tha se Kosova dhe Serbia janë pajtuar mbi aneksin e zbatimit të marrëveshjes për normalizimin e marrëdhënieve mes dy vendeve.  e normalizimit të marrëdhënieve mes tyre.

Palët kanë rënë dakord që të zbatojnë të gjitha nenet e marrëveshjes së propozuar nga Bashkimi Evropian më 27 shkurtit në Bruksel.

“Kemi pasur një ditë të gjatë. Synimi i sotëm ishte që Serbia dhe Kosova të pajtoheshin mbi atë se si do ta zbatonin marrëveshjen e pranuar më 27 shkurt në Bruksel. Kjo do të thotë hapa praktikë mbi atë se çka duhet të bëhet dhe si. Kam kënaqësinë të them se pas 12 orësh kemi një marrëveshje dhe pajtim. Mund të deklaroj se Kosova dhe Serbia janë pajtuar mbi aneksin e zbatimit për rrugën e normalizimit të marrëdhënieve mes tyre. Si pjesë e këtij aneksi palët janë pajtuar që të zbatojnë të gjitha nenet e marrëveshjes dhe të implementojnë detyrimet e tyre në mirëbesim”, është shprehur ai.

Për sa i përket Asocacionit Borrell deklaroi: “Për nenin 7 – Kosova është pajtuar që të fillojë menjëherë, dhe kur them menjëherë, them menjëherë, negocimin për të vendosur aranzhimet dhe përgatitje për të siguruar një nivel të mirëfilltë të vetëmenaxhimit të komunitetit serb”.

Në nenin 7 flitet për formalizimin e statustit të Kishës Ortodokse Serbe e po ashtu për sigurimin e “një niveli të përshtatshëm të vetëqeverisjes”.

“Të dyja palët përkushtohen për arritjen e aranzhimeve specifike, në përputhje me instrumentet relevante të Këshillit të Evropës dhe duke përdorur përvojat ekzistuese evropiane, për të siguruar një nivel të përshtatshëm të vetëmenaxhimit për komunitetin serb në Kosovë dhe mundësinë për provizione të shërbimeve në disa fusha specifike, përfshirë edhe mundësinë e asistencës financiare nga Serbia dhe kanale të komunikimit direkt të komunitetit serb me Qeverinë e Kosovës. Palët do të formalizojnë statusin e Kishës Ortodokse Serbe në Kosovë dhe të ofrojnë nivel të lartë të mbrojtjes së trashëgimisë fetare dhe kulturore serbe, në përputhje me modelet ekzistuese evropiane”, thuhet në nenin 7.

Në përfundim Borrell tha se palët të cilat nuk respektojnë marrëveshjet do të përballen me pasoja.

Kryeministri i Kosovës Albin Kurti deklaroi pas përfundimit të takimit 12-orësh në Ohër, se Serbia dhe Kosova janë pajtuar mbi aneksin e zbatimit të marrëveshjes për normalizimin e marrëdhënieve mes dy vendeve.

Kurti tha se Vuçiç dhe pala serbe ranë dakord për aneksin e zbatimit, por iu shmangën firmosjes së saj.

Sipas Kurtit arritja e një dakordësie të tillë në bisedime është një njohje de-facto e Kosovës.

“Kemi arritur pajtim publik për një ankes që do të sigurojë zbatimin e marrëveshjes bazë. Kjo është njohje de-facto në mes Kosovës e Serbisë. Sot mund të themi që e kemi edhe aneksin e zbatimit përcjellës, por i ikën nënshkrimit të marrëveshjes bazë, e i ikën edhe nënshkrimit të aneksit. I takon BE-së të gjejë mekanizmin ta bëjë statusin e kësaj marrëveshje ligjërisht dhe ndërkombëtarisht të obligueshme”, deklaroi Kurti.

Kurti foli edhe çështjen e nenit 7, që sipas ndërmjetësit Josep Borrell do të nisë së implementuari menjëherë.

“Në këtë aspekt ekziston një paragraf që flet për një nivel adekuat të vetëmenaxhimit të komunitetit joshumicë serb dhe natyrisht që do të udhëhiqemi prej standardeve më të larta në mënyrë që edhe serbët në Kosovë të mos kenë asnjë cenim, asnjë diskriminim, duke mos harruar që propozimi i Ahtisaarit u ka krijuar hapësirë e mundësi tejet të mëdha që t’i gëzojnë të drejtat e t’i plotësojnë nevojat e tyre”, u shpreh ai

Në përfundim të takimit presidenti i Serbisë Aleksandër Vuçiç tha se gjatë bisedimeve me kryeministrin e Kosovës Albin Kurti dhe përfaqësuesve të BE-së, Josep Borrell dhe Miroslav Lajçak nuk u nënshkrua asnjë dokument, por pranoi se palët ranë dakord për “njëfarë marrëveshjeje”.

Vuçiç tha se pikat që kanë rënë dakord do të bëhen pjesë e kornizës së negociatave dhe se zbatimi i marrëveshjeve do të vlerësohet nga Këshilli Evropian.

“Sot ishte dita kur duhej të merreshim vesh për planin e zbatimit. Ajo që është e rëndësishme të thuhet është se këto pak pika për të cilat kemi rënë dakord do të bëhen pjesë e kornizës së negociatave. Një nga pikat kyçe është se Këshilli Evropian do të vlerësojë se sa është bërë me planin e zbatimit, i cili do të zgjerohet. Formimi i AKS-së ishte vendosur si detyrim prioritar. Më duhet të them se jam vërtet i kënaqur me të. Ende flitet për persona të zhdukur, për konferenca donatorësh. Plani me siguri do të duhet të përmirësohet”.

/DRONI.al/