DETAJE/Pranoi të bashkëpunonte me drejtësinë, çfarë zbuloi para hetuesve Bengasi

Alkond Brengasi tashmë është një bashkëpunëtor me drejtësinë, kjo pasi Prokuroria për Krime të Rënda arriti ta bindë  për të zbardhur grabitjen e 9 prillit në Rinas.

Ditën e djeshme, Gjykata caktoi ndaj tij masën e sigurisë “Arrest në burg” deri në përfundim të hetimeve, ndërsa burime konfirmojnë se Bengasi ka dhënë informacione të vlefshme për hetimin dhe do të marrë statusin e bashkëpunëtorit të drejtësisë.

Gjatë ditës së sotme pritet që para Gjykatës për Krime të Rënda të dalin 3 të arrestuarit e tjerë për grabitjen e miliona eurove në Rinas, Oltion Veseli, Renaldo Sula dhe Saimir Çela.

Si u zbulua ai nga policia?

Bengasi është i pari i arrestuar si i përfshirë në grabitjen që tronditi opinionin publik dy javë më parë, ndërsa hetuesit e zbuluan atë nga shenjat e lëna në furgonin me mbishkrimin “Hetimi Tatimor”, të përdorur nga organizatorët e grabitjes për të hyrë në Aeroportin e Rinasit dhe vjedhur disa thasë me vlera të ndryshme monetare.

Pas identifikimit të tij, 34- vjeçari është shoqëruar në Polici ditën e shtunë, 20 prill, ku edhe ka treguar se ka marrë pjesë në modifikimin e furgonit, si dhe emrat e disa prej personave të përfshirë në të ashtuquajturën supergrabitja, ku humbi jetën nga shkëmbimi i zjarrit me Policinë, Admir Murataj.

Hetimet

Panorama shkruan se Bengasi ka nxjerrë emrat e të paktën 9 personave, 3 prej tyre të arrestuar.

Prokuroria dhe Policia, me anë të metodave speciale të hetimit, ka vënë nën përgjim një sërë numrash, duke bërë kështu identifikimin e disa personave që dyshohet se janë pjesë e grupit që grabiti rreth 5.8 milionë euro në Aeroportin e Rinasit. Alkond Bengasi mësohet se kishte 6 muaj që punonte në servisin e marrë me qira nga vëllai i Klement Çalës, Eldi Çala, të cilët dyshohet se janë ndër organizatorët e grabitjes.

Nga hetimet e deritanishme, burime thonë se pjesë e grupit që në një formë apo në një tjetër kanë marrë pjesë në grabitje, janë 9 persona, për të cilët po punohet që të arrestohen. Ndërkohë, mesditën e djeshme, Gjykata për Krime të Rënda zhvilloi me dyer të mbyllura seancën për caktimin e masës së sigurisë ndaj Alkond Bengasit, i cili u përfaqësua nga një avokat i caktuar kryesisht, kjo pasi nuk pranoi mbrojtjen nga avokati i gjetur nga familja.

Si përfaqësues të Akuzës, në seancë ishin dy prokurorët Arenc Çela dhe Klodian Braho, të cilët pas relatimit të provave dhe dëshmisë së Bengasit, i cili nuk ka folur para Gjykatës, kërkuan caktimin e masës së sigurisë “Arrest në burg” për të.

/DRONI.al/