Basha – Fleckenstein-it: Opozita vullnet për dekriminalizimin e kuvendit

Pas përfundimit të takimit me kreun e PD-së, Lulzim Basha raportuesi i Parlamentit Europian për Shqipërinë Knut Fleckenstein u shpreh optimist për zgjidhjen e krizës dhe se ditët në vijim opozita të jetë në kuvend.
“Patëm bashkëbisedim të mirë me Ramën dhe Metën.  Jam optimist për zgjidhjen e krizës dhe që ditët në vijim opozita të jetë në kuvend. Besoj se opozita do të jetë në seancën e ardhshme në Kuvend”, u shpreh  raportuesi i Parlamentit Europian.
Një ditë më parë Fleckenstein u takua me kryetarin e kuvendit Ilir Meta dhe kryeministrin Edi Rama.
Nga ana e tij kryetari i PD-së Lulzim Basha nuk deklaroi nëse do të ishte javën e ardhshme në kuvend, ndërsa këtë periudhë e quajti një proces komunikimi që sapo ka nisur. Pyetjes nëse opozita do të jetë javën tjetër në Kuvend Basha nuk iu përgjigj.
 “Ardhja e javës tjetër e zotit Kukan, interesimi i institucioneve europiane për situatën e rëndë të demokracisë parlamentare në Shqipëri dhe dëshira e tyre për të ndihmuar në tejkalimine kësaj situate, dhe njohja më tej për shkaqet pse Parlamenti erdhi në këtë ditë  dhe konfirmimi i vullnetit të opozitës për të ecur përpara me eliminimin e këtyre shkaqeve, që janë dekriminalizimi i kuvendit dhe pajtueshmëria e tij me Kushtetutën , vendimet e Gjykatës Kushtetuese dhe në tërësi sundimin e ligjit. Ky është një proces që kërkon vullnet politik, opozita e ka dhe e kam nënvizuar që në shtator që opozita  kërkon të jetë në kuvend  por një kuvend që funksionon sipas ligjit e Kushtetutës që nuk i shkel dhe i nëpërkëmb ato. Në një Kuvend që përfaqëson interesat e qytetarëve dhe jo interesat e grupeve kriminale. Procesi sapo ka nisur dhe është proces komunikimi. Ia vlen rezultati që presin jo vetëm ne si opozitë por dhe qytetarët, një parlament mirëfunksional. Më shumë se fjalime para kamerave të angazhohemi si për pozitën ashtu dhe për opozitën ti japim fund kësaj situate pa precedent”, u shpreh kreu I PD-së Lulzim Basha, në përfundimtë këtij takimi.

/DRONI.al/