FOTO/ Asnjë i mbijetuar nga avioni rus që ra në Egjipt

Një avion rus me 224 persona në bord është rrëzuar në Gadishullin Sinai në Egjipt. Mediat e huaja i referohen konfirmimit që erdhi nga zyra e e shtypit e kryeministrit të Egjiptit.
Forcat e sigurisë egjiptiane kanë konfirmuar se nuk ka pasur asnjë të mbijetuar pavarësisht “zërave që u dëgjuan brenda rrënojave të avionit, teksa deri tani janë gjetur trupat e 100 viktimave dhe kanë dalë fotot e para të viktimave.
Trupat e viktimave të para kanë mbërritur tashmë në Kajro. Presidenti rus Vladimir Putin ka shpallur ditë zie të dielën.
Avioni u rrëzua në zonën e Hassana, në jug të Arish. Forcat e sigurisë zbuluan rrënojat e përplasjes në një zonë të largët malore në një rajon që përmban shumë terroristë të lidhur me ISIS.
Sipas të dhënave të para mësohet se Airbusi A-321 ishte nisur nga një resort turistik në Sharm el-Sheik, në Detin e Kuq dhe kishte si destinacion qytetin e Shën Petersburgut në Rusi.
Avioni ishte pronë e kompanisë ajrore “Kogalymavia”. Besohet se në momentin e rrëzimit në bord kanë qenë 200 pasagjerë të rritur, 17 fëmijë dhe shtatë pjesëtarë të ekuipazhit, 214 shtetas rusë dhe 3 ukrainas.
Avioni u rrëzua 25 minuta pasi u ngrit nga vendpushimi në Detit të Kuq, Sharm el-Sheikh.
Ayman al-Mugadem i Komitetit të Incidenteve të Aviacionit tha se piloti ka paralajmëruar kontrollin e trafikut ajror që avioni kishte pasur një problem teknik dhe “kishte nevojë për t’u ulur në tokë sa më shpejt të jetë e mundur’.
Presidenti rus Vladimir Putin ka dërguar ekipin e vet të ekspertëve në vendin e rrëzimit për të përcaktuar shkakun e katastrofës.

Pistat e hetimit

Ekspertët kanë nisur hetimet, dhe deri më tani janë ngritur tre hipoteza.

Së pari mendohet se avaria me natyrë teknike mund të jetë një prej shkaqeve.
Së dyti hetuesit dyshojnë se moti i keq mund të ketë shkaktuar rënien e avionit, edhe pse Airbus është mjaft rezistent ndaj kohës së keqe.
Së treti nuk përjashtohet mundësia e ndonjë sulmi terrorist. Sinaj është një nga vatrat e ISIS. Duke u nisur nga sulmet e fundit ruse mbi objektivat e ISIS, ka dyshime që kemi të bëjmë me ndonjë sulm terrorist.

/DRONI.al/