Kryeministri Aleksis Tsipras, kishte deklaruar se dëmshpërblimi që Greqia kërkon nga Gjermania për pushtimin në Luftën II Botërore ishte më tepër moral, por pas vetëm një jave pune Komisioni i ngritur posaçërisht për këtë çështje ka dalë me një shifër.
Janë 279 miliard euro që Greqia i kërkon shtetit më të fuqishëm të Bashkimit Europian për pushtimin e vendit nga nazistët.
Një shifër kjo që tejkalon borxhin prej 240 miliard eurosh që Greqia ka marrë në vitin 2012 nga Trojka e kreditorëve ndërkombëtarë, për shlyerjen e të cilit negociatat vazhdojnë që prej ngjitjes në pushtet të qeverisë së Syriza-s.
Komisioni parlamentar, i kryesuar nga zëvendësministri i Financave, Dimitris Mardas, gjithashtu kërkon edhe fshirjen e një borxhi që Banka greke është detyruar të marrë nga Gjermania naziste asokohe, që kap vlerën e 10.3 miliard eurove, si dhe rikthimin e disa pasurive arkeologjike.
Fushata për pagimin e dëmshpërblimit është përforcuar së tepërmi në vitet e fundit, kur Greqia është përfshirë nga kriza ekonomike.
Tsipras ka fajësuar shpesh Gjermaninë për qëndrimin e fortë ndaj masave shtrënguese që qeveria e tij kërkon të zhvlerësojë, ndërsa ja ka përmendur edhe në takimin në Berlin kancelares Angela Merkel.
Gjermania vazhdimisht ka hedhur poshtë pretendimet e Greqisë, duke thënë se i ka shlyer të gjitha detyrimet, përfshi edhe një pagesë prej 115 milion markash gjermane të kryer në vitin 1960.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
