Qeveria “hap vende të reja pune” 5 mijë lekë për çdo spiunim ndaj biznesit

Nga sot, kush denoncon se një biznes ka shitur pa kasë, apo s’ka paguar sigurimet e punonjësve, merr 5 mijë lekë nga Drejtoria e Tatimeve. Ministria e Financave ka miratuar udhëzimin e ri “Për përcaktimin e rregullave dhe masës së shpërblimit të informatorëve të jashtëm”. Mban firmën e ministrit Shkëlqim Cani dhe hyn në fuqi menjëherë.

Udhëzimi për informatorët

Në udhëzimin e ri, quhen informatorë të jashtëm. “Informatorët e jashtëm, të cilët japin informacion pranë administratës tatimore për shkelje në fushën e përdorimit të pajisjeve fiskale nga ana e subjekteve tatimpaguese, mund të shpërblehen financiarisht”, theksohet në pikën e parë të udhëzimit.

Por jo çdokush që jep informacion mund të marrë shpërblim. Udhëzimi përjashton ata që denoncojnë me telefon, me email, apo shkresa, pa u paraqitur fizikisht. Ndërsa të drejtën e shpërblimit e kanë vetëm “informatorët që paraqiten fizikisht pranë administratës tatimore për raportimin e shkeljeve”.

Pagesa e informatorëve

Në udhëzim është përcaktuar edhe mënyra e pagesës. Pasi merr informacion nga denoncuesi, “Punonjësi i autorizuar” ia përcjell drejtorisë së hetimit pranë Tatimeve. Këta të fundit dërgojnë një grup inspektorësh në biznesin e denoncuar.

“Pas ezaurimit të procedurës së verifikimit, në rastet kur denoncimi rezulton i vërtetë, punonjësi i autorizuar kontakton denoncuesin, duke kërkuar prej tij të dhënat e numrit të llogarisë për të kryer pagesën”, thekson udhëzimi. “Masa e shpërblimit të informatorëve të jashtëm për çdo denoncim të verifikuar është në masën 5.000 (pesëmijë) lekë. Personi, i cili ka marrë dijeni për shkeljet në përdorimin e pajisjeve fiskale për shkak të detyrës nuk e gëzon të drejtën e përfitimit të këtij shpërblimi”.

Udhëzimi pra përjashton punonjësit tatimorë. Informatorët e Tatimeve, për të marrë shpërblimin duhet të plotësojnë një formular, që gazeta po e boton sot. Në këtë formular, jepen të dhënat e informatorit, numri i telefonit, fotokopje e kartës së identitetit, si edhe numri i llogarisë. Këtu do të kalojë shpërblimi për denoncimin.

Ja kapen nga informatorët

Por çfarë quhen shkelje që mund të denoncohen nga informatorët? E para është biznesi i paregjistruar, e dyta është mosdeklarimi i të punësuarve dhe e treta është shitja pa kupon tatimor.

Këto janë pikatë më të rëndësishme. Në formularin që boton gazeta, janë gjithsej 10 shkelje që mund të denoncohen nga “informatorët e jashtëm”. Por jo vetëm kaq. Informatorët mund të denoncojnë edhe punonjësit e Tatimeve. Dhe informacioni në këtë rast është më subjektiv.

Në pikat e denoncimit sipas formularit, janë edhe “Përdor pasuritë shtetërore për nevoja personale” apo “Favorizon evazionin fiskal nëpërmjet kontakteve informale”.

Pra, në rast se një tatimor shkon në shtëpi me makinën e punës, mund të quhet përdorim i pasurisë shtetërore, ose në rast se takohet në kafe me një biznesmen, mund të quhet favorizim me anë të kontakteve informale.

Sidoqoftë, të gjitha denoncimet do të kalojnë nëpërmjet personit të autorizuar dhe Drejtorisë së Hetimit. Do të jenë këta të fundit, që do t’i përdorin të dhënat.

/DRONI.al/