Dëshmia tronditëse e Artan Tafanit për goditjen e Albi Bashaliut, të gjitha detajet

I arrestuari per grup kriminal, Artan Tafani vijoi sot dëshminë  në GJKKO për ngjarjen e rëndë ku mbeti i vrarë Albi Bashaliu. Në dëshminë e dhënë para prokurorit Behar Dibra, Tafani ka treguar detaje të hollësishme mbi mënyrën se si është kryer vrasja dhe organizimi që i ka paraprirë asaj.

“Pasi mbaruam punë, nuk na ndezi makina Audi që kishim. Mora ‘benzin’ gri me targa greke. Pasi kaluam Kavajën, kam çmontuar armën. Në atë kohë kalonin dhe makina të tjera që s’duhet të na shikonin që hidhnim pjesë të armës. Kur erdhëm në Tiranë, kemi lënë ‘benzin’-in në Astir dhe, për të humbur gjurmë, kemi ecur në këmbë. Kemi marrë 30 mijë euro; na i ka sjellë i ati i Laertit, Qamil Haxhiu, dhe ato 30 mijë i kemi ndarë në 3 pjesë: unë, Lulzim Arapi dhe Laerti. Këto lekë i ka dhënë një person që e thërrisnin Limi. Para ngjarjes fliste Laerti me të,” tha Tafani.

Ai shtoi se: “Pas një muaji erdhën edhe lekët e tjera, dy herë nga 10 mijë, na i solli Qamili, babai i Laertit. I ati i Laertit, Qamili, një herë në dy-tre muaj vinte tek ne dhe qëndronte disa ditë.”

Prokurori Behar Dibra e pyeti:
“Si ju ka prezantuar Laert Haxhiu viktimën Albi Bashaliu para vrasjes?”
Tafani u përgjigj:
“Pasi ka komunikuar me Lorenc Lalën, na e ka shpjeguar edhe ne që do i bënim nder ‘Limit’.”

Në një moment tjetër të dëshmisë, prokurori e pyeti:
“Mund të na e sqarosh kush janë çunat e vrarë?”
Tafani tha:
“Di që ishin dy çuna që ishin vëllezër, Enriko Xhahysa dhe një tjetër. Më tha që më kanë vrarë babin.”

Më tej, Tafani rrëfen:
“Pasi ka folur Laerti me Limin, na ka çuar një video të Enrikos në një makinë, e cila ishte e viktimës. Pas videos, kam takuar të zotin e hallit, pra Enrikon. Në qendër të Rrogozhinës më priste Enriko që të më tregonte shtëpinë e viktimës. Enriko kishte veshur një bluzë gri me kapuç, hyri në makinë dhe u shtri. U nisëm për në fshat, më tregoi lokalin, shtëpinë. Pak më lart kishte shtëpinë Enriko. Nuk kam pasur takime të tjera.”

Prokurori: “Është përmendur emri i Laertit?”
Tafani: “Emri i Laertit nuk është përmendur. Enriko më ka thënë që jam nipi i Limit, që është Lorenc Lala.”

Sipas dëshmisë së dhënë, për vrasjen janë përdorur dy makina: një Audi e bardhë dhe një Mercedes Benz.
“Makinen Mercedes Benz e lamë tek një dyqan që shiste lule në autostradë. Në Gjocaj, ku kishte banesën viktima, shkuam me Audin e bardhë. Pas vrasjes, shkuam me makinën e viktimës tek makina tip Benz dhe ikëm për në Tiranë. Makinën e viktimës e dogjëm, ndërsa gjatë rrugës çmontova edhe armën,” tregoi Tafani.

Ai përmendi edhe një person tjetër të rëndësishëm në rrjetin e organizimit:
“Lili është krahu i djathtë i Sajmir Taullahut. Lili mbante lekët e të gjithëve – të Laertit, të Sajmirit, të të gjithëve.”

Për mënyrën se si është zhvilluar ngjarja, Tafani sqaroi:
“Audi i bardhë drejtohej nga Lulzimi, ndërsa unë kisha ‘benzin’-in, derisa kemi arritur në Rrogozhinë. Më pas mora Audin, ‘benzin’-in e lamë që ta kishim kur të ktheheshim. Lulzimi kaloi pasagjer, unë shofer. Parkuam 10 metra nga vendi ku ndodhi ngjarja. Viktima ka ardhur rreth orës 8 të mëngjesit. Audi ishte te garazhi i Elisjano Abedinit. Targat i ka marrë Lulzimi diku në Tiranë – të vjedhura.”

Prokurori: “Pas ngjarjes u kthyet prapë tek ‘benzi’?”
Tafani: “U rikthyem me makinën e viktimës. Lulzimi ndezi ‘benzin’-in dhe më priste. Audi nuk ndezi dhe e dogjëm në vendngjarje. E dogjëm se kështu e mendova unë, kishim në makinë dy bidona benzine. Djegia e Audit në vendngjarje nuk ishte e menduar; do e digjnim ku lash ‘benzin’-in.” a.b

/DRONI.al/