Një marrëveshje për të dërguar të burgosurit shqiptarë në Britani për ta kryer dënimin në vendin e tyre ka rezultuar në kthimin e vetëm 16 personave, anëtarë bandash e trafikantë droge.
Shqiptarët që vuajnë dënime më të gjata se katër vjet mund të kthehen për të vuajtur dënimin në Shqipëri, me qëllim kursimin e miliona sterlinave të taksapaguesve britanikë si dhe për lirimin e qelive.
Vitin e kaluar, kur u nënshkrua marrëveshja, Ministria britanike e Drejtësisë bëri të ditur se kursimi do të ishte 25 milionë sterlina gjatë dhjetë vjetëve.
Numri i vogël i kthimeve ka të bëjë me pengesat që shkaktohet nga sistemi i drejtësisë shqiptare, shkruan gazeta “The Times”.
Në 2013 – 2014, në burgjet britanike ishin rreth 200 shqiptarë, prej të cilëve 100 plotësonin kushtet për rikthim të detyruar në vendin e tyre dhe për të cilët u nisën procedurat nga Ministria e Brendshme britanike. Shqiptarët zënë vendin e pestë midis të burgosurve të huaj në burgjet e Anglisë dhe Uellsit.
Më 30 qershor të vitit të kaluar, në burgje ishin 512 shqiptarë, 1012 polakë, 745 irlandezë dhe 674 rumunë.
Keith Vaz, deputet dhe anëtar i komisionit të drejtësisë, thotë: “Numri i burgosurve shqiptarë të kthyer nën këtë marrëveshje është qesharak. Taksapaguesit nuk kanë pse të paguajnë në këtë mënyrë për të burgosurit e huaj”.
Muajin e kaluar, të burgosurit shqiptarë në burgun Guys Marsh në Dorset publikuan fotografi në sitin Jeta osh qef, ku shfaqeshin duke festuar në qeli. Pamjet e publikuara më pas në shtypin britanik ngjallën shumë irritim midis britanikëve, të cilët paguajnë për të dënuarit që vuajnë dënimin në burgjet e vendit të tyre.
Një zëdhënëse e ministrisë së drejtësisë tha se po punohet me qeverinë shqiptare për të rritur numrin e të burgosurve që do të transferohen në burgjet shqiptare.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
