Si dështoi skema Xhafaj – Rama, me kunatin Berberi e vasalin Dvorani për ta pastruar dosjen e Agron Xhafajt

PD ka denoncuar sërish sot skemën e dështuar të Fatmir Xhafajt dhe Edi Ramës për të kapur drejtësinë, për qëllimin e vetëm pastrimin e dosjeve të të afërmve të tyre.
Duke ju rikthyer kërkesës për ekstradim nga Venezuela, të Agron Xhafajt, vëllait të Fatmir Xhafajt, PD kujton rastin e ngjashëm me kërkesën e njëjtë nga Belgjika për Mark Frrokun.
“Tik-taku i kohës se bandës po ecën me shpejtësi. Po vjen ora e ligjit dhe e drejtësisë:, shprehet midis të tjerave PD në një deklaratë për mediat.

Deklarata e plotë e PD-së

Faktet e fundit në lidhje me të kaluarën kriminale të vëllait të Fatmir Xhafës, të caktuar nga Edi Rama në krye të komisionit për Reformën në Drejtësi, nxjerrin në pah këmbënguljen në skemën për kapjen e prokurorëve dhe gjykatësve, e gjithë institucioneve përmes kunetërve e besnikëve të devotshëm.
Sidomos lajmi se Venezuela ka sjellë në Shqipëri një kërkesë ekstradimi për vëllanë e Xhafës në lidhje me trafikun ndërkombëtar të drogës, zbulon nevojën e tij për të qenë në krye të reformës e për të kapur me çdo kusht drejtësinë.
Nëse do funksiononte skema Xhafaj – Rama, me kunatin Berberi e vasalin Dvorani, e të tjerë toga kamikaze, dosja e drogës do pastrohej, e kaluara do fshihej, trafikanti ndërkombëtar që e ka vëllanë kryetar të Reformës në Drejtësi do të shpëtonte.
Por Rama, Xhafaj bashkë me vëllanë në kërkim ndërkombëtar për trafik droge nga Venezuela në Spanjë e Itali, nuk ia dolën dot të nënshtronin drejtësinë dhe standardet e Venecias e përkushtimi i opozitës dogjën skemën e tyre mafioze.
Pse hesht Xhafaj për faktet që kanë dalë në dritë?
Pse nuk reagon Rama?
E provuan duke fshehur kërkesën e Belgjikës për Frrokun dhe dështuan. Sa herë kanë ndërmend të qëndrojnë mbi ligjin për interesat e krimit? Tik-taku i kohës se bandës po ecën me shpejtësi. Po vjen ora e ligjit dhe e drejtësisë.

/DRONI.al/