VËREJTJET & PROPOZIMET/ Oficerët e Policisë Gjyqësore, kundër projektligjit që rregullon veprimtarinë e tyre

Trupa e Oficerëve të Seksionit të Policisë Gjyqësore, në Prokurorinë pranë Gjykatës së Shkallës së Parë Tiranë ka paraqitur disa propozime në lidhje me projektligjin “Për organizimin dhe funksionimin e policisë gjyqësore”.
Duke ju drejtuar Komisionit për Çështjet Ligjore, Administratës Publike dhe të Drejtat e Njeriut, kjo trup vëren
disa problematika, për të cilat kërkon diskutimin me deputetët anëtarë të këtij komisioni dhe kryesisht relatorit të këtij projektligji.
“Të nderuar anëtarë të komisionit!
Nga studimi i këtij projektligji të bërë nga ana jonë, rezulton se në tërësinë e tij ai paraqet disa problematika në hartimin e tij dhe për këtë arsye po ju paraqesim disa propozime në lidhje me nenet konkrete.
Këto propozime të cilat parashtrojmë më poshtë, kërkojmë gjithashtu të diskutohen me debat të hapur me Anëtarët e Komisionit të Ligjeve dhe kryesisht relatorit të këtij projektligji Z. Ulsi Manja”, kërkon Trupa e Oficerëve të Seksionit të Policisë Gjyqësore, në Prokurorinë pranë Gjykatës së Shkallës së Parë Tiranë.
“Mendojmë se ky ligj duhet riparë edhe njëherë duke ngritur një grup pune nga të gjitha strukturat edhe shërbimet policore apo të administratës publike, të cilëve ligji u njeh të drejtën që të kryejnë hetime.
Gjithashtu ligji duhet harmonizuar edhe me ndryshimet që priten të bëhen në projekt ligjin ‘Për disa shtesa dhe ndryshime në ligjin Nr. 7905, datë 21.03.1995 Kodi i Procedurës Penale i Republikës së Shqipërisë’, pasi nuk ka një harmonizim midis tyre për sa i përket neneve që i përkasin Policisë Gjyqësore”, bën të ditur më tej Trupa e Oficerëve të Seksionit të Policisë Gjyqësore, në Prokurorinë pranë Gjykatës së Shkallës së Parë Tiranë.
DRONI.al

/DRONI.al/