Shpallet vendimi për anëtarët e ‘bandës së tritolit’. Apeli i Krimeve të Rënda ka dhënë sot dënimin për 7 anëtarët e kësaj bande që drejtohej nga Julian Sinanaj.
Andon Mehillaj është dënuar me burg përjetë, ndërsa Genis Mehillajn me 10 vite.
Po ashtu, kreu i kësaj bande, Julian Sinanaj i ka shpëtuar dënimin me burg përjetë, për shkak dhe të statusit të tij si i penduar, duke u dënuar me 25 vite burgim, ndërsa Ndriçim Gjokonën dhe Marjon Mitron me nga 8 vite. Anëtari i këtij grupi që është dënuar me më pak vite burg, përkatësisht me 5, është Ilir Karçinin.
Banda e tritolit akuzohet për rreth 38 akuza, përfshi vrasjen e Sokol Veizit dhe Agron Çelës, si dhe për vendosjen e tritolit ish-deputetit të Partisë Demokratike, Ardian Kollozi.
Akuzat
Të pandehurit në shkallën e parë u dënuan me 85 vite burg në total dhe një burgim të përjetshëm. Përkatësisht; Genis Mëhillajn me 10 vjet burg, Ndriçim Gjokonajn me 8 vjet burg, Marjon Mitron me 19 vjet burg, Albin Mexhajn me 8 vjet burg, biznesmenin Ilir Karçini me 5 vjet burg dhe me burgim të përjetshëm Anton Mëhillajn. Ndaj 7 anëtarëve të bandës rëndonin 38 akuza, si “Vrasje me paramendim, për interes”, “Vepra me qëllime terroriste”, “Pjesëmarrje në grup të strukturuar kriminal”, “Kryerje e veprave nga grupi i strukturuar kriminal” si dhe “Sigurimi i kushteve për të kryer vrasjen”.
Hetimi për këtë grup nisi në janar 2014, pas disa atentatesh me armë zjarri dhe lëndë plasëse që ndodhën ose që mbetën në tentativë në Vlorë dhe Tiranë.
Arrestimi i kreut të grupit, Julian Sinanaj, më 25 janar 2014 dhe prangosja e ndihmësit të tij Ndriçim Gjokona, hapi rrugën e zbardhjes së të paktën gjashtë ngjarjeve të rënda kriminale, dy nga të cilat vrasje me armë në Vlorë dhe të tjerat atentate me eksploziv të mbetura në tentativë. Sinanaj, i cilësuar si “vrasës me pagesë” akuzohet se ka vrarë me paramendim, për interes shtetasin Sokol Veizi, në gusht 2012. Këtë krim Sinanaj akuzohet se e ka kryer në formën e grupit të strukturuar kriminal në bashkëpunim me të dyshuarit si porositës, Erjon Mëhillaj, Genis Mëhillaj dhe mbështetësin Ndriçim Gjokona. Në të njëjtat rrethana ai akuzohet se ka tentuar vrasjen e shtetasit J. M. në Vlorë, ngjarje nga e cila Julian Sinani është tërhequr në momentin e fundit. Sinanaj akuzohet edhe për armëmbajtje pa leje, vepra me qëllime terroriste, në bashkëpunim në formën e grupit të strukturuar kriminal me të dyshuarin si porositës Andon (alias Erjon) Mëhillaj, që kanë shkaktuar shkatërrim serioz të pronës private, si dhe kanë synuar vrasjen e Ardian Kollozi në Vlorë.
“Vrasësi me pagesë” akuzohet se në vazhdim ka kryer edhe veprën penale “prodhim dhe mbajtje pa leje të lëndëve plasëse” si dhe “vrasje me paramendim për interes” të shtetasit Agron Çela, kryer në bashkëpunim në formën e grupit të strukturuar kriminal me të pandehurin Andon (alias Erjon Mëhillaj). Në këtë rast, Sinanaj akuzohet edhe për krimin e “mbajtjes pa leje në ambiente publike të armëve luftarake”.
Dënimet për 7 anëtarët e “bandës së tritolit”
Andon Mehillaj – me burg përjetë
Genis Mehillaj – 10 vite burgim
Julian Sinanaj – 25 vite burgim
Ndriçim Gjokonën – 8 vite burgim
Marjon Mitron – 8 vite burgim
Albin Mexhaj – 8 vite burgim
Ilir Karçinin – 5 vite burgim
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
