Luneda Sufali është kthyer në personazhin më të komentuar sot në rrjetet sociale, dhe jo vetëm. Pas incidentit të sotëm në Komisionin Parlamentar të Ligjeve, me Fatmir Xhafën, kreun e këtij komisioni, ajo ka “kapur majat”. Drejtoresha e Lojërave të Fatit iu përgjigj ironikisht Xhafajt ndërsa ai e pyeti se kush ishte, duke i thënë “pastruese”. Pas kësaj, kreu i komisionit të Ligjeve i kërkoi disa herë të dilte jashtë por Sufali nuk ka pranuar, duke sfiduar Xhafajn.
Luneda është vajza e tretë e familjes Sufali. Në shkollë ka shkëlqyer në shkencat ekzakte dhe në adoleshencë ka dashur të bëhet gazetare investigative. Madje ka punuar në një televizion lokal në qytetin e Durrësit, e më pas në një radio. Por ndikimi i dy prindërve me profesion ekonomistë ishte i fortë: studimet e larta i vazhdoi për Ekonomik.
Ka nisur të punojë që studente, shpesh duke bërë njëherazi disa punë: nga bankat e deri në kompani private shqiptare e të huaja. Ka përfunduar studimet e larta në vitin 2005 dhe më pas ka ndjekur një master po në këtë degë.
Drejtorja e re e Agjencisë së Mbikëqyrjes së Lojërave të Fatit është e para femër në një post të tillë dhe nuk ka hyrë kurrë në një kazino. Në një intervistë pak kohë pasi kishte marrë detyrën e saj në vitin 2013, Sufali thoshte se “Mua më pëlqejnë sfidat”. “Personat që më propozuan të jem aty mesa duket e kanë kuptuar këtë. Më kanë vendosur përballë një sfide. E kuptoj përgjegjësinë, jam me këmbë në tokë. Kur mendoj se çfarë lloj tregu është, e besoj që nuk është e thjeshtë. Nuk është e lehtë, por do t’ia dal mbanë”, deklaronte ajo.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
