“Pas dy ditësh, Edi Rama, ka vendosur të japë një koncesion prej 61 milionë eurosh për shërbimin e dializës. 61 milionë euro do të marrë me 3 gusht një mik i Edi Ramës, siç e tregon përvoja e deritanishme dhe qepja e kritereve sipas portretit të fituesit të paracaktuar. Sipas ekspertëve të fushës, mjafton 1/10 e kësaj shume për të përmirësuar shërbimin ekzistues e për ta bërë atë funksional”.
Denoncimi është bërë sot nga PD, e cila nga ana tjetër shton se Edi Rama, jo vetëm po i jep 61 milionë euro klientit të tij, por po e nxjerr dhe këtë shërbim jashtë sistemit duke ia besuar njerëzve të tij për interesa biznesi dhe jo për interesat e shëndetit të qytetarëve.
“Edi Rama e ka shndërruar shëndetësinë në minierë përfitimesh financiare me koncesionet e njëpasnjëshme që po jep për miqtë dhe donatorët e tij. Premtoi shëndetësi falas por pas dy vitesh shëndetësia është bërë pazari më i madh në vend, kushtet janë në ditën më të keqe, qytetarët po paguajnë më shumë se asnjëherë tjetër, shërbimi është skandaloz, ndërsa miliona euro po përfundojnë në xhepat e klientelës. Kudo në çdo sektor të shëndetësisë, Edi Rama po zbulon biznese milionash me skema mafioze të rimbursimit të ilaçeve e me koncesione që i përfitojnë të afërmit e kryeministrit. Kjo është goditja më e madhe që i është bërë shëndetësisë me pasoja të rënda që do kërkojnë shumë kohë e mund të rikuperohen”, denoncon më tej PD, e cila garanton se nuk do ta lejojë këtë biznes monstruoz me jetën e qytetarëve të vendit.
“Ne garantojmë qytetarët se do të anulojmë çdo koncesion korruptiv dhe do vëmë para ligjit përgjegjësit sapo qytetarët të na japin besimin e tyre për të drejtuar vendin”, përfundon denoncimi i PD-së.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
