Adriatik Llalla: Prokuroria po heton disa zyrtarë të lartë për korrupsion

Kryeprokurori Adriatik Llalla ka deklaruar nga Korça se Prokuroria ka në hetim  disa zyrtarë të lartë të akuzuar për korrupsion.
“Është e domosdoshme referimi i rasteve të zyrtarëve të nivelit të lartë, jo vetëm nga policia po nga të gjithë institucionet e tjera ligj-zbatuese në vend. Pa diskutim që Prokuroria ka filluar hetimet e saj për disa zyrtarë të lartë që janë në proces hetimi, tashmë rastet janë bërë publike”, u shpreh Llalla.
Këtë deklaratë kreu i akuzës e bëri pas analizës vjetore të Prokurorive  në nivel apeli në qarkun e Korçës, ku ka kërkuar nga vartësit të rrisin hetimet kryesisht  për korrupsion.
“Lufta kundër korrupsioni mbetet prioritet i punës së institucionit tonë, ashtu edhe i gjithë institucioneve të tjera ligj-zbatuese. Ne do të vijojmë të japim kontributin tonë në këtë drejtim në bashkëpunim me institucionet e tjera ligj-zbatuese”.
Prokurori i Përgjithshëm, Adriatik Llalla vuri sërish në qendër të kritikave policinë shkencore. Ai tha se vonesat e ekspertimeve po zvarrisin proceset hetimore.
Kritika ndaj kësaj strukture të policisë kryeprokurori shprehu edhe një ditë më parë në analizën e policisë, në prani të ministrit të brendshëm.
Ai e kritikoi policinë edhe për mungesë të procedimeve penale, ndaj në Korçë u kërkoi prokurorëve që të shtojnë hetimet e nisura me iniciative të tyre.
Gjatë analizës së prokurorisë Korçë kryeprokurori kërkoi koordinim më të madh të punës me policinë. Ndërsa i pyetur në lidhje me reformën në drejtësi,  kreu i akuzës nuk ka pranuar te japë ndonjë koment duke deklaruar se reforma në drejtësi tashmë do të diskutohet në nivele  më të larta.

/DRONI.al/