Berisha takon kryeministrin kroat, Plenković dhe kryetarin e LDK, Abdixhiku

Kreu i PD, Sali Berisha takoi sot në ambientet e kongresit të PPE në Valencia, kryeministrin kroat, Plenković dhe kreun e LDK, Abdixhiku.

Gjatë Kongresit të Partisë Popullore Evropiane në Valencia, u zhvillua një takim bilateral mes kryetarit të Partisë Demokratike të Shqipërisë, z. Sali Berisha, dhe Kryeministrit të Kroacisë, z. Andrej Plenković. Takimi u zhvillua në një atmosferë të përzemërt dhe me pjesëmarrjen edhe të Ministrit të Punëve të Jashtme dhe Evropiane të Kroacisë, z. Gordan Grlić Radman, si dhe Ministres së Kulturës dhe Medias, znj. Nina Obuljen Koržinek.

“Gjatë takimit u diskutua mbi zhvillimet politike në Shqipëri, sfidat që vijnë nga regjimi aktual, si dhe zgjedhjet e ardhshme vendore të 11 majit. Kryeministri Plenković dhe delegacioni kroat shprehën mbështetjen për proceset demokratike në Shqipëri, dhe vlerësuan rëndësinë e forcimit të bashkëpunimit politik dhe institucional ndërmjet forcave të qendrës së djathtë në rajon”, njoftoi zyra e shtypit të PD.

Gjatë Kongresit të Partive Popullore Evropiane u zhvillua një takim i rëndësishëm mes kryetarit të Lidhjes Demokratike të Kosovës, z. Lumir Abdixhiku, dhe stafit të tij, me kryetarin e Partisë Demokratike të Shqipërisë, z. Sali Berisha, dhe kabinetin e tij. Takimi u karakterizua nga një atmosferë tepër miqësore dhe e afërt, duke reflektuar lidhjet e kahershme dhe bashkëpunimin tradicional mes dy partive simotra të qendrës së djathtë në hapësirën shqiptare.

“Në qendër të diskutimeve ishin sfidat politike me të cilat përballen Kosova dhe Shqipëria në dy faza të ndryshme të proceseve zgjedhore – Kosova në periudhën paszgjedhore dhe Shqipëria në prag të zgjedhjeve. Të dy liderët ndanë analiza mbi zhvillimet e fundit politike në vendet e tyre, duke theksuar nevojën për qasje të bashkërenduar dhe mbështetje të ndërsjellë në përballimin e sfidave demokratike, si dhe forcimin e institucioneve përfaqësuese dhe demokratike”, njoftoi zyra e shtypit e PD.

/DRONI.al/