Paul Pogba kishte një agjent shqiptar që ia menaxhonte të drejtat e imazhit. Ylli Kullashi është shqiptari i cili ka menaxhuar 40% të të drejtave të imazhit të futbollistit francez, në vitin 2014, ndersa kishte përfituar rreth 5 milionë euro pas një marrëveshje të futbollistit të Manchester United me kompaninë e njohur Adidas, në vitin 2016, sipas rrjedhës së dokumenteve “Football Leaks”.
Një kosovar fitoi rreth 5 milionë euro nga imazhet e Pogbas, sipas “Football Leaks”
Futbollisti i njohur francez, Paul Pogba së bashku më agjentin e tij Mino Raiola kanë përdor një kompani në parajsat fiskale në ishullin Jersey për të fshehur paratë dhe për të ruajtur të drejtat e imazhit të futbollistit për arsye tatimore.
Rrjedhjet e dokumenteve “Football Leaks” të publikuara në median franceze Mediapart, pretendojnë se lojtari më i shtrenjtë në botë dyshohet se është përfshirë në mosmarrëveshje midis agjentit aktual të tij, Mino Raiola dhe ish-agjentëve Oualid Tanazefti dhe shqiptarit Ylli Kullashi, për të fituar kontrollin e imazhit të futbollistit.
Në vitin 2014, ish-agjenti dhe këshilltari i Pogbas, francezi Tanazefti dhe shqiptari nga Kosova Ylli Kullashi, arritën një marrëveshje me Pogban në nëntor të vitit 2014, e cila i dha dy menaxherëve Tanazefti dhe Kullashi të gjitha të drejtat e imazhit të lojtarit për një periudhë prej 15 vjetësh.
Siç shkruan Mediapart, e cila bazohet në dokumentet e “Football Leaks”, Tanazefti dhe Kullashi i blenë të drejtat e futbollistit për një shumë që sillej prej 1.5 milionë deri në 5 milionë euro.
Në atë kohë, të drejtat e imazhit të Pogbas kaluan tek Tanazefti (i cili mori 60% të të drejtave të imazhit) dhe Ylli Kullashi (i cili mori 40% të drejtave të imazhit) përmes një kompanie nga Luksemburgu, raporton Insajderi.
Megjithatë, kur Raiola u bë përfaqësuesi i lojtarit, ai bëri gjithçka që t’i merrte të drejtat e imazhit të Pogbas, derisa ia arriti ta bënte një gjë të tillë në vitin 2015.
Raiola zhvendosi paratë nga të drejtat e imazhit të Pogbas në Jersey, një ishull në kanalin anglez, në të cilin ka kompani që fshehin paratë (offshore).
Pogba, më 16 mars të vitit 2016, nënshkroi një kontratë 10-vjeçare me kompaninë e veshjeve, Adidas, nga e cila do të fitonte 40 milionë euro, thotë Mediapart.
Por siç raportonte gazeta e njohur franceze L’Equipe, marrëveshja me kompaninë e Adidasit u bë e mundur vetëm pasi Raiola u pagoi nga pesë milionë euro Tanazeftit dhe Kullashit për të drejtat e imazhit të Pogbas.
Ylli Kullashi është një menaxher futbollistësh nga Kosova, me banim në Francë.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
