Mbyllet faza e parë e kërkimeve në Lin, 12 tipe fshatrash në vitet 6000-4000 para Krishtit

Zbulim historik në Lin: përmbyllet faza e parë e kërkimeve, zbulohet vendbanimi më i vjetër me palafite në Europë

POGRADEC – Faza e parë e gërmimeve arkeologjike në sitin parahistorik të Linit, në bregun perëndimor të Liqenit të Ohrit, është përmbyllur me sukses, duke konfirmuar rëndësinë e jashtëzakonshme të këtij vendbanimi për historinë e qytetërimit europian. Gërmimet, të zhvilluara gjatë periudhës 2021–2025 në kuadër të një bashkëpunimi katërvjeçar ndërmjet Universitetit të Bernës dhe Institutit të Arkeologjisë në Tiranë, e klasifikojnë Linin si vendbanimin më të vjetër të njohur në Europë me palafite dhe me materiale druri e organike të ruajtura në mënyrë të jashtëzakonshme.

Në një deklaratë për mediat, ambasadorja e Zvicrës në Shqipëri, Ruth Huber, vlerësoi këtë nismë si një model bashkëpunimi shkencor ndërkombëtar që jo vetëm rrit kapacitetet kërkimore shqiptare, por edhe pasuron kuptimin tonë për fillesat e qytetërimit në kontinent. “Gërmimet kanë dhënë rezultate shumë të mira dhe gjetjet janë shumë premtuese,” u shpreh ajo.

Profesor Albert Hafner nga Universiteti i Bernës, drejtues i projektit, e cilësoi zonën e Linit si një nga sitet më të mirëruajtura në Europë, duke theksuar se dendrokronologjia – datimi përmes unazave të pemëve – po funksionon edhe për distanca më të gjera, duke mundësuar për herë të parë krahasimin e gjetjeve ndërmjet Linit dhe zonës së Ohrit.

Arkeologu shqiptar Adrian Anastasi shtoi se janë zbuluar objekte me vlerë të madhe, përfshirë vegla të punës, enë qeramike të dekoruara me teknikën e impresos (një nga format më të hershme të poçarisë), si dhe struktura të reja mbrojtëse që dëshmojnë për organizimin e vendbanimeve.

Ndër gjetjet kryesore të fazës së parë përfshihen:

• Hapja e llogoreve në tokë dhe kërkime nënujore;
• Zbulimi i më shumë shtyllave druri të shtëpive të hershme;
• Gjetje të reja qeramike që dëshmojnë lidhje me bregdetin Adriatik;
• Shtimi në pesë i numrit të unazave mbrojtëse të sitit;
• Gjetja e grumbujve të pishave si mbetje banesash;
• Prova të një vazhdimësie jetese që mbulon mbi 2,000 vite dhe të paktën 10–12 faza vendbanimi nga viti 6,000 deri në 4,000 para Krishtit.

Zbulimet në Lin dhe Buqezë po tërheqin gjithnjë e më shumë vëmendjen e ekspertëve dhe institucioneve kulturore europiane, duke e pozicionuar zonën si një pikë kyçe për kërkimin arkeologjik në Europën Juglindore.

Ky projekt është një shembull i shkëlqyer i bashkëpunimit mes Shqipërisë dhe Zvicrës në fushën e shkencës dhe trashëgimisë kulturore.

/DRONI.al/