Në prag të 1 Qershorit, festës së fëmijëve, një libër që i kushtohet mbështetjes së fëmijëve pa kujdes prindëror ose që rrezikojnë ta humbasin atë është publikuar këto ditë. Bëhet fjalë për “Pema këngëtare” të shkrimtares së njohur për fëmijë Rovena Rrozhani.
“Pema Këngëtare” është një ftesë për të besuar në ëndrrat tona, për të dhuruar dashuri dhe për të mbështetur ata që kanë më shumë nevojë. Të ardhurat nga shitjet e këtij libri shkojnë në mbështetje të fëmijëve pa kujdes prindëror apo që rrezikojnë ta humbasin këtë kujdes.
Libri rrëfen historinë e një peme që ëndërron të bëhet këngëtare dhe një zogu që është në në kërkim të një strehe për të jetuar. Me mesazhet për miqësinë, mbështetjen e fëmijëve në vështirësi dhe mjedisin, shkrimtarja rovena Rrozhani sjell librin e saj më të fundit në prag të 1 qershorit. Libri vjen në dy gjuhë, shqip dhe anglisht, me përkthimin e Klodiana Skendaj, ndërsa ilustrimet janë të piktores Blegina Bezo. Redaktimi mban emrin e shkrimtares së njohur për fëmijë, Adelina Mamaqi.
Libri u promovua në një aktivitet të veçantë, ku morën pjesë përfaqësues të bankës Credins, SOS Fshatrat e Fëmijëve nën drejtimin e moderatores së njohur Enxhi Nasufi. Për fëmijët e komunitetit, u shpërndanë dhurata të ndryshme bashkë me librin “Pema Këngëtare”. Nën një atmosferë të ngrohtë dhe shumë të bukur, fëmijët patën mundësinë të bënin pyetje, të shprehnin mendimet dhe të ndanin emocionet për librin e ri. “Pema Këngëtare” vjen nën logon e shtëpisë botuese “Mediaprint” dhe gjendet në të gjitha libraritë. a.b
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
