Në Gjykatën e Tiranës janë dëgjuar dëshmitë e para të pesë të miturve në kuadër të hetimeve për vrasjen e Martin Canit, ngjarje e ndodhur pranë shkollës “Fan Noli”, ku i dyshuar është Mario Përlleshaj. Seanca u zhvillua në prani të prindërve dhe psikologes, në respekt të procedurave për marrjen e dëshmive të fëmijëve.
Dëshmitë u përqendruan në dinamikën e ngjarjes, ndërsa seanca e radhës u caktua për datën 28 maj, në orën 10:15, ku pritet të dëgjohen edhe tetë të mitur të tjerë.
Seanca nuk ka kaluar pa tensione. Një përplasje verbale u regjistrua mes prokurores së çështjes, Alma Felaj, dhe prindërve të Luiz Meçës, i cili mbeti i plagosur në ngjarje. Babai i Luizit reagoi me indinjatë ndaj mënyrës së hetimit, duke protestuar me zë të lartë dhe duke u detyruar nga trupi gjykues të largohej nga salla.
Debati u ndez në momentin kur u diskutua mbi ditën para ngjarjes. Sipas të dhënave të paraqitura në sallë, Martin Cani dhe Luiz Meçe kishin qenë në Kavajë duke luajtur futboll, dhe ishin kthyer në Tiranë të shoqëruar nga prindërit e Luizit. Në vijim, u përmend mundësia që të miturit të kenë debatuar në telefon me autorin e dyshuar gjatë mbrëmjes. Prokurorja Felaj sugjeroi se “mbase prindërit kanë qenë në gjumë” në ato orë, deklaratë që shkaktoi reagimin e menjëhershëm të babait të Luizit, i cili iu drejtua prokurores: “Ju po flini gjumë me dosjen, ne na zien zemra çdo ditë”.
Seanca e 28 majit pritet të jetë vendimtare për zbardhjen e plotë të ngjarjes tragjike që tronditi opinionin publik. a.b
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
