Rama në ‘sy m’sy’, debate por në asnjë çast llogari. Si anashkalon Rama dështimet

Kryeministri Edi Rama komentoi sot kritikat për fushatën elektorale të Partisë Socialiste.

“Këta thonë se fushata e PS dhe e Ramës është tallava, tallje me këtë e me atë. Po si ka mundësi? E para, këta nuk dinë se çfarë është tallavaja. Këta janë përbuzës të kulturës shqiptare. Po, po! Këta janë përbuzës të atij fondi thesaresh që ka krijuar kultura jonë. Nëse ne hapim një takim të madh me njerëzit tanë, kush na ndalon ne që aty edhe të përdorim këngë që janë nga thesari i kulturës tonë sipas qarqeve? Kush e ka shkruar këtë që kur mblidhen njerëzit në një takim të madh elektoral të dëgjojnë fjalime me orë të tëra në diell? Që kur unë merrem me fushatë elektorale, shikoni se si kanë ndryshuar edhe të tjerët. Kush i solli për herë të parë njerëzit të ulen në takime? Edhe kjo historia me këngët dhe vallet do ta shikoni se do ta përdorin më vonë”, tha Rama.

Disa nga pyetje-përgjigje të Ramës në sy m’sy:

Lum ti që ke gjetur popull. Mjerë populli që të ka ty, mor i mjerë more”. Mario.

Mario.. ça t’i thuash këtyre që i bien popullit si ata që thoshin populli është i sëmurë. Mario, ti duhet të jesh shumë krenar që je pjesë e këtij populli se ky popull ka kaluar gjëra që pakpopuj kanë kaluar dhe ja ku është sot; se prindërit e tu janë pjesë e këtij populli dhe me siguri kanë sakrifikuar shumë për ty që ti të kesh edhe facebook dhe të flasësh këtu, kështu që popullin lëre rehat se populli e di mirë se çfarë bën, populli  ka një shqisë që individualisht ne nuk e kemi por që të gjithë bashkë që përbëjmë popullin, ia japim atë kapacitet kështu që popullit nuk ia hedh dot njeri, ti Mario.

“O Zot na mbytën komunistët”. Ah i shkreti ti që s’di ça janë komunistët fare.

“Kur ka qenë bufi kryeministër, gjërat kanë qenë më mirë, ka pasur më shumë para për njerëzit, ti ua dhe vetëm 2-3 personave, 90% e popullit po vuan. Ti do varur”. Ti s’di ça flet. Ky quhet lavazh truri. Është term politik. Lavazhi i trurit është një term në literaturën politike që përdoret për njerëz të cilët në jetën normale janë normalë dhe pastaj kur hyjnë tek politika, janë trushpëlarë kompletamente dhe flasin gjëra që nuk bëjnë asnjë sens. Nuk kanë asnjë logjikë. Nuk bazohen në asnjë argument, por flasin.

“Edhe sa vite duhet të votojnë për ty shqiptarët që të fusin Shqipërinë në BE? Apo tallje me këto pleqtë e mbaruar”? Pleqve të mbaruar iu merr të keqen, ti Komiti Rojeka se keni dhe ca emra të çuditshëm ju profilet fallco të kënetës. Megjithatë të të përgjigjem seriozisht, po mirë meqë është problemi im që nuk është futur Shqipëria në BE, meqë është problemi im, pse nuk është futur Mali i Zi që i ka hapur negociatat në 2012 , përpara se sa unë të bëhesha kryeministër? Po Serbia që i ka hapur negociatat në 2014 , pse nuk është futur ne BE? Apo edhe për këto unë e kam fajin? Po Maqedonia që ka ndërruar dhe emrin dhe është bërë kandidate në 2005, pse nuk është akoma në tryezën e negociatave dhe si shpjegohet që ne negociatat i kemi hapur vjet dhe i kemi në tavolinë planin për t’i mbyllur në 2027, më shpejt nga gjithë të tjerët? Sepse, miku im, në BE ti nuk futesh thjesht dhe vetëm se i ke bërë detyrat, e kam shpjeguar 1000 herë këtë. Në BE futesh vetëm atëherë kur ti i ke bërë detyrat dhe ata janë gati të të hapin derën. Dhe ajo derë hapet në një moment dhe mbyllet për një kohë të gjatë siç e ka treguar historia e zgjerimit, kështu që tani është hapur dera, prandaj dhe tani duhet t’i mbyllim negociatat, prandaj. Kjo nuk është tallje, kjo është e vërteta që mund ta verifikosh nëse hap pak, pak fare dhe lexon si funksionon kjo punë, dakord? r.p

/DRONI.al/