PPE: Lulzim Basha ka treguar lidership për partinë dhe për vendin e tij

Partia Popullore Evropiane mbështet konsensusin e arritur mes aktorëve kryesorë politikë në Shqipëri për miratimin e reformës në drejtësi. Sipas PPE, Lulzim basha Basha ka treguar lidership për partinë dhe për vendin e tij
Këtë qëndrim e ka shprehur në një deklaratë për mediat, Presidenti i Partisë Popullore Evropiane (PPE), Joseph Daul

Deklarata e plotë e Presidentit të Partisë Popullore Europiane (PPE), Joseph Daul
 

Ne i kemi ndjekur nga afër diskutimet dhe negociatat për draftin e reformës së gjyqësorit në Shqipëri. Kjo reformë është shumë e rëndësishme për Shqipërinë dhe qytetarët e saj. Ndërsa bisedimet shpesh kanë qenë të vështira dhe komplekse, kryetari i Partisë Demokratike Lulzim Basha ka negociuar me sukses dhe kontribuar në një rezultat të frytshëm. Presidenti Basha ka treguar lidership edhe për partinë e tij dhe për vendin e tij duke luajtur një rol të rëndësishëm në arritjen e një marrëveshje që i shërben interesit të të gjithë popullit shqiptar.
Një sistem i pavarur dhe transparent i drejtësisë mbetet një nga elementet kryesore të nevojshme për një vend demokratik që të ketë sukses dhe të rritet më tej. Shqiptarët meritojnë të kenë një sistem drejtësie, ku asnjë qytetar nuk është mbi ligjin dhe ku korrupsioni të mos lulëzojë. Ne jemi të gatshëm për të ndihmuar dhe për të mbështetur partnerët tanë shqiptarë në krijimin e një sistemi të tillë drejtësie.
Vota e nesërme për paketën e reformave në sistemin e drejtësisë do të jetë një hap për integrimin e Shqipërisë në BE dhe bazat për një të ardhme më të mirë për popullin e saj. Partitë politike shqiptare dhe deputetët, duke përfshirë edhe Partinë Demokratike, duhet të demonstrojnë përkushtimin e tyre për kauzën evropiane dhe të përmbushin pritshmëritë e qytetarëve të tyre duke kaluar këtë legjislacion të reformës në drejtësi.

/DRONI.al/