VIDEO/ Dhëndri nga Maqedonia blen nuse për 830 euro në Pogradec

Një histori e pabesueshme ka ndodhur me një familje në Pogradec që ka martuar vajzën me një burrë nga Maqedonia. Një vajzë është blerë nga burri i saj i ardhshëm për rreth 52 mijë denarë dhe pasi ka lindur fëmijë është dëbuar nga i shoqi duke u lënë në mëshirë të fatit. Nazmije Donov nga Pogradeci është blerë për 52 mijë denarë, rreth 830 euro. Këtë e dëshmoi personi që i ka dhënë hua Marjanit, maqedonasit që u martua me pogradecaren.
Është një histori e dhimbshme, ku shqiptarë në varfëri ekstreme shesin vajzat në martesa jashtë vendit, por pa e ditur se maqedonasi e dëshiron një grua vetëm për të lindur fëmijë, dhe më pas nuk i nevojitet dhe e lë, duke i privuar madje të shohë dhe fëmijën.
Shoku i Marjanit dëshiroi që ta fshehim identitetin e tij. Marjani kishte kërkuar borxh nga shoku i tij për të marrë nuse Nazmijen. Ai ka dy vjet që padit Marjanin se nuk i ka kthyer borxhin.
“Ai kërkoi hua prej meje. Unë kam pasur restorant dhe ai ka blerë gjëra prej aty. Në mënyrë të ndershme ka blerë. Gjatë kësaj, ai më tha që i kishte vdekur fëmija që e kishte me gruan e parë. Mua më thoshte se është pa grua, edhe në këtë kontekst unë i thash shumë lehtë mund të gjesh për 500 euro një grua në Shqipëri. Për 20 ditë m’i pagoi të gjitha borxhet për restorantin dhe pastaj tha para dëshmitarëve që ato para që i ka për nusen shqiptare, i ka harxhuar dhe kërkoi hua shtesë. Unë i dhashë hua para dëshmitarëve. Kërkova noter, ndërsa ai shkroi vetë me dorë se merr 52 mijë denarë që të martohet me shqiptare”, thotë shoku i Marijanit, njofton TV21.

Nga ana tjetër, Marjani nuk pranon se ka dhënë para për të marrë nuse Nazmijen, në pyetjet e gazetares të TV21 përgjigjet:

Sa para keni dhënë për Nazmijen?
Jo, menjëherë po ju them jo.

Sa para keni dhënë?
Nuk kam dhënë para.

Përse atëherë e keni rrahur?
Nazmijën nuk e kam rrahur.

Nazmija e cila jeton jashtë vatrës familjare dhe pa fëmijën e saj ka pajtur një avokate. Daniella Ilieva zyrtarisht është avokate e Nazmijes.
Nga Ambasada e Shqipërisë thonë se zyrtari nga konsullata që duhet ta shqyrtojë rastin është jashtë vendit.
TV21 u drejtua edhe te Qendra për Punë Sociale në Kavadar, ata nuk pranuan të komentojnë për rastin e Nazmijes.
Aktualisht, në gjykatë po procedohet rasti se kujt do t’i takojë fëmija 2-vjeçar, Ilija. Sipas avokates, gjasat janë të mëdha që t’i takojë Marijanit, pasi Nazmija nuk ka kushte për jetesë.
Familja Amxhai nga Pogradeci i Shqipërisë mbërriti në Kavadar për të komunikuar me Nazimijen, e cila thekson se është viktimë e dhunës nga burri i saj. Por, familja e Nazmijës mbeti rrugëve, pasi dhëndri nuk i pranoi në shtëpi, as për sqarim.
Nëna e saj, Rajmonda e trishtuar, rrëfen se kishin kaluar tre muaj që nuk kishte kontakt me bijën e saj. “Çupa nuk më ka marrë në telefon 3 muaj. Nuk ja dija adresën. Unë kur e thërrisja në telefon nuk më njoftonte askush. I thosha burrit si ka mundësi që nuk lajmërohet asnjë njeri. Çupën e kishte çuar policia. Dua arsyen pse e morri pse e çoi çupën në polici pa e dituar fare unë dy muaj. Jam nisur që nga katër ora e mëngjesit që kam ardhur këtu. Për shkak të evlatit. Evlati i rrugëve nuk është, ka shyqyr zotit nënë e baba, motra ka katër, pa njeri nuk është. Nuk e lejoj këtë që ka bërë dhëndri”, rrëfen e ëma e Nazmijes.
Kusheriri i Nazmijes, Aleko, kërkon llogari nga dhëndri duke kërkuar të dijë se cilat janë arsyet për dëbimin e vajzës nga shtëpia dhe ndarjes së nënës nga fëmija. “Nëse ky burrë është i larë, pse nuk del të na takojë dhe tregojë se farë është muhabeti. Ky burri i asaj nuk është burrë, por është legen. Për çfarë arsye e ka marrë gruan dhe e ka bredh poshtë e lartë dy muaj nëpër polici. Pasi nuk i bënte gruaja, le të merrte telefonin le t’i informonte prindërit. Pse ta shpie dy muaj nëpër gjykata nëpër policia pa ditur prindërit e saj. Për çfarë arsye? Duam ta dimë”, shprehet kushëriri Aleko Magjistari.
Avokatja Daniella Illieva thekson se sipas ligjit, prindërit e vajzës mund ta shohin nipin e tyre. “Sot erdhi familja e Nazmijes, tërë ditën ishin këtu te unë. Përmes telefonit mundoheshin me ndërmjetësues që ta shohin nipin e tyre. Por nuk u kanë lejuar. U kthyen prapë këtu pasi Marijan Donov burri i Nazmijes i ka kërcënuar që do të thërrasë policinë nëse qëndrojnë tek dera. Njerëzit erdhën këtu dhe u ankuan se nuk mund të shihnin më nipin e tyre. Sipas ligjit ata kanë të drejtë nëpërmjet nenit 9 ligji i familjes”, thotë avokatja Ilieva.
Gjatë ditës së sotme, TV21 kërkoi nga Ambasada e Shqipërisë përgjigje për atë se çfarë masash mund të marrin në lidhje me shtetasen shqiptare, pasi leje-qëndrimi i Nazmijes ka skaduar. Por, nga Ambasada ende nuk ka ndonjë përgjigje.

/DRONI.al/