Edi Rama, 120 milionë euro mikes së tij, që të bëjë taksinë për kampionet e gjakut

PD ka vijuar sërish sot me denoncimin e koncesionit prej 120 milionë euro, për kontrollin mjekësor të grup-moshës 40 – 65 vjeç. Duke denoncuar në emër të PD-së, deputetja Albana Vokshi u shpreh se për këtë koncesion punën e bënë personeli shëndetësor, shtetëror, ndërsa paratë i merr mikja e Edi Ramës, Vilma Nushi, vetëm pse bënë “taksinë për kampionet e gjakut”.

Deklarata e plotë e deputetes Albana Vokshi


“Koncesioni 120 milionë euro për Vilma Nushin, është korrupsioni më skandaloz që ka ndodhur deri tani me Edi Ramën, edhe pse vjedhjet dhe abuzimet janë nga më masivet e më të larmishmet në çdo drejtim e në çdo fushë.
Edi Rama i dha mikes së tij, Vilma Nushi, 120 milionë euro, që popullsia nga 40 deri në 65 vjeç të bëjë një kontroll mjekësor. Eksperiencë e tillë e padëgjuar më parë në asnjë vend të Evropës apo edhe në botë.
Por çfarë po ndodh në realitet me koncesionin e Vilmës?
Edhe pse paratë për të dytin vit, mikja e Edi Ramës i ka marrë paradhënie; kontrollin e kanë bërë vetëm rreth 10 për qind e qytetarëve të parashikuar (popullsia nga 40 – 65 vjeç është rreth 1 milion banorë).
Kontrolli bëhet me infrastrukturën dhe pajisjet e qendrave shëndetësore, me stafin e qendrave shëndetësore. Punën e bëjnë infermierët dhe stafi që paguhet nga shteti, nga taksat tona. Madje infermierët e qendrave shëndetësore punojnë mesatarisht 3 – 4 orë në ditë për llogari të Vilmës. Pra punë e bërë nga stafi i QSH pa asnjë bonus pasi Vilma as këtë nuk e paguan.
Vilma deri më sot duhet të hapte 18 laboratorë, deri më sot vetëm 3 janë hapur, ndërsa 15 të tjerëve u është blerë vetëm emri se analizat e tyre sillen në Tiranë.
E vetmja gjë që bën mikja e kryeministrit, është se bën taksinë, në fakt merr kampionet me makinat që shpërndan duhanin, biznesin e saj primar.
Pra 120 milionë euro, Edi Rama, ia ka dhënë mikes së tij, që makinat e saj pasi të kenë shpërndarë cigaret nëpër Shqipëri, në kthim, ato të marrin kampionet e lëna disa orë në pritje, çka dëmton edhe garancinë e cilësinë e analizës që në shumë raste edhe ngatërrohen.
Një kaos skandaloz që jo vetëm nuk po i shërben qytetarëve, por po bëhet një rrezik i madh për shëndetin e tyre.
Partia Demokratike i kërkon mikes së Edi Ramës të tërhiqet nga ky abuzim e të kthejë paratë e shqiptarëve.
Partia Demokratike do ta anulojë këtë vjedhje, këtë abuzim skandaloz me paratë dhe shëndetin e shqiptarëve.
Me 8 dhjetor nis përballja pa kthim, për të ndalur këtë hajdutëri, këtë korrupsion të përbindshëm”.

/DRONI.al/