FOTO/ Durrës, burrat në qeli gratë “pushtojnë” gjykatën: Vrasësit jashtë, fukarenjtë në burg

Burrat në qeli dhe gratë dyerve të gjykatës. Kjo është panorama që ofrohet mëngjesin e kësaj të hëne nga Gjykata e Durrësit.
Arrestimet pa paralajmërim të drejtuesve të motorëve nga policia e qarkullimit rrugor, kanë shkaktuar probleme të rënda sociale te familjet e tyre. Mbi 30 drejtues motorësh u arrestuan gjatë fundjavës, dhe ky fillim jave ka sjellë dyndje njerëzish në Gjykatën e Durrësit.
Familjarët e të arrestuarve kanë tejmbushur ambientet brenda e jashtë gjykatës duke pritur masat e sigurisë së të afërmve. Pjesa më e madhe e të arrestuarve i përkasin kategorisë pa patentë, por ka dhe nga ata që i janë vënë prangat për mungesë dokumentacioni.

Vrasësit rrinë jashtë, ndërsa fukarenjtë në burg

Të shqetësuara pa masë për fatin e keq të familjarëve të tyre, këto zonja shprehen mbi të gjithë të revoltuara për shkaqet që i kanë çuar ata prapa hekurave. Sipas tyre, është i tmerrshëm motivi i prangosjes së motoristëve, të cilët po mbushin plot burgjet, kur në këtë vend ka kriminelë që bredhin ende të lirë rrugëve.
Alma Bulcari, thotë për “Durrës Lajm” se bashkëshorti i saj Ilirjan Bulcari, kishte vetëm 3 ditë që sapo ishte kthyer nga Greqia, kur u arrestua.
“Punoi atje një muaj, tani lekët i ha avokati. Djalin e kam për operacion, burri është në burg. Ku të shkoj më parë. Fukarenjtë e shkretë po mbushin burgjet. Motori është i tipit ‘Piagio’. Im shoq gjithnjë pa patentë lëvizte. S’ia kanë kërkuar kurrë. Po ta dinte që punët do shkonin kështu, s’do të lëvizte fare. Vrasësit rrinë jashtë, ndërsa fukarenjtë në burg”, thotë ajo e pikëlluar.

Arratisja, zgjidhja e vetme për t’i shpëtuar “diktaturës” së këtij vendi
Ndërsa, një e moshuar të cilës i kanë arrestuar djalin, Ilir Cullhaj, 33 vjeç, thotë se zgjidhja e vetme për t’i shpëtuar “diktaturës” së këtij vendi është arratisja.
“Djali punon në ndërtim dhe me motor shkonte për në punë. Të premten e arrestuan kur po kthehej nga puna. Ka tre ditë në qeli dhe akoma nuk na kanë caktuar masë sigurie. Është tmerr! Djali im me rroba pune pa vrarë qoftë dhe një mizë dhe jo më ndonjë njeri, duhet të rrijë në burg tani. Ky shtet po fut përditë njerëz pa faj në burg. Do arratisemi!”, shprehet e revoltuar e moshuara Yllijete Cullhaj.

(“Durrës Lajm”)

/DRONI.al/