Ortodoksët kundër Ramës edhe për 20 përqindëshin

Kisha Ortodokse Autoqefale e Shqipërisë ka hedhur poshtë përfundimin e kryeministrit Rama sipas të cilit Kisha nuk po financon prej dy vitesh restaurimin e kishave.

“Është për të ardhur keq që organet kompetente shtetërore e kanë informuar në mënyrë jo të plotë Shkëlqesinë e Tij, Kryeministrin e Shqipërisë, z. Edi Rama, i cili pa dashur, duke mos folur për të gjithë situatën e përgjithshme, i bëri një padrejtësi Kishës dhe nuk informoi në mënyrë objektive opinionin publik.

Jemi të detyruar të rikujtojmë, se me gjithë se Kishës Orthodhokse Autoqefale të Shqipërisë nuk i kanë kthyer pronat e saj dhe pavarësisht se është përballur me probleme ekonomike, arriti të grumbullojë për këtë qëllim nga donatorë të ndryshëm në mbarë botën, mbi 11 milionë euro dhe me to ka restauruar mbi 60 manastire dhe kisha të shenjta- monumente kulture – në zona të ndryshme të Shqipërisë. Midis këtyre po përmendim manastiret e Shën Jorgjit në Çukë, Shën Dhimitrit në Qeparo, manastirin e Lindjes së Hyjlindëses në Ardenicë, të Fjetjes së Hyjlindëses në Zvërnec, të Shën Nikollës në Cepo, të Fjetjes së Hyjlindëses në Kakome, të Shën Joan Pagëzorit në Voskopojë, të Shën Joan Vladimirit në Elbasan etj. Janë restauruar dhe kisha madhështore, si ato të Eleusës në Përmet, të Kryengjëjve në Gjirokastër, të Shën Nikollës në Grabovë, të Shën e Premtes në Kavajë, të Shën Spiridhonit në Berat, të Shën Gjergjit në Libofshë etj”, thuhet ndër të tjera në deklaratën e Kishës Ortodokse.

Në v ijim të deklaratës thuhet se qeveria e Ramës u ka marrë edhe 20% taksë fondeve që u përdorën për restaurim. “Vështirësia e mbledhjes së fondeve gjatë dy viteve të fundit, lidhet me faktin se kostot e restaurimeve të mëparshme të Kishës (11 milion euro), u rënduan edhe me taksën 20%-shit, që paguan firmat që morën përsipër realizimin e veprave (duke ndihmuar kështu në fuqizimin e buxhetit të shtetit). Edhe ky fakt i ka dekurajuar donatorët”, theksohet në deklaratë.

/DRONI.al/