Nën presion e krizës së konsumit, fitimet e qendrave tregtare në Tiranë kanë rënë dukshëm, duke i vënë disa prej tyre para falimentit të pashmangshëm. Pas nxjerrjes në shitje nga kreditorët të “City Park”, qendra tjetër tregtare, “Casa Italia” tashmë ka hequr dorë nga logoja duke u cilësuar Mega Outlet.
Si njoftohet nga ekstrakti në QKR, aksioneri i mazhorancës “Erjol” shpk ka përvetësuar të gjitha aksionet e “Casa Italia” statusi, i së cilës është çregjistrim pa likuidim.
Kompania “Erjol” që në momentin e regjistrimit kishte 75 % të aksioneve ka përthithur pjesën e mbetur të aksioneve të ortakëve Italianë dy vite pas hapjes, me 2008. Por më datë 20 shkurt 2013 “Casa Italia” kalon totalisht në pronësi të “Erjol” shpk. Sipas mandatit bankar të dorëzuar në QKR, për pagesën e kapitalit në para, “Erjol” shpk ka paguar 100 lekë për përthithjen e “Casa Italia”-s.
Qendra Tregtare e nisi aktivitetin në vitin 2006 me seli në kthesën e Kamzës Autostrada Tiranë – Durrës, km 0 (Komuna Kashar) me objekt në aktivitet në fushën e tregtisë me pakicë, të bareve, restoranteve e hotelerisë duke përfshire këtu të gjitha ambientet argëtuese në funksion të tyre si disko, klube nate, e lojëra të ndryshme argëtuese, administrim,menaxhim dhe shërbime të ngjashme për ndërtesa sociale, të biznesit.
Aktiviteti i “Casa Italia” që nisi në kulmin e bumit të konsumit në vend, duket se, ka humbur shkëlqimin nga kriza e vitit 2008 dhe konkurrenca e ashpër në lëmin e qendrave tregtare.
Të ardhurat nga vit në vit nisën të bien teksa, detyrimet e qendrës u rritën. Sipas të dhënave nga bilanci që kompania ka dorëzuar në QKR të ardhurat e kompanisë në vitin 2011 u ulën 39 për qind në krahasim me vitin 2010. Ndërsa detyrimet arritën në 49 milionë lekë, 90 për qind e të cilit ishte ndaj bankave.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
