Konfirmohet zyrtarisht se dy turistët çekë, janë vrarë nga brenda makinës, me të cilën udhëtonte edhe autori i dyshuar. Ka mjaftuar nga një plumb, nga prapa, në kokë për secilin prej viktimave, për tu marrë jetën.
Detaje e reja i ka bërë publike Zëvendësdrejtori Përgjithshëm i Policisë, në seksionin e Krimeve të Rënda, Ardian Çipa. Sipas tij, pas këqyrjes së trupave dhe ekspertizës mjeko-ligjore, mësohet se dy turistët janë qëlluar me nga një plumb pas koke.
“Është një ngjarje e cila ka angazhuar policinë dhe prokurorinë të punojë për të identifikuar autorët dhe për ti vendosur përpara drejtësisë. Ndërkohë kërkojmë ndihmën e komunitetit veçanërisht nga banorët e zonës për të transmetuar informacion për autorët. Policia ka ofruar një shpërblim prej 30 mijë eurosh për autorët, duke garantuar edhe anonimatin për personat që do informojnë policinë. Hidhen dyshime se autori i krimit ka qenë brenda mjetit të dy viktimave duke realizuar vrasjen nga brenda. Gjithsesi të gjitha provat e gjetura i nënshtrohen hetimeve”, u shpreh Çipa.
Grupi hetimor, i kryesuar nga Prokurori Besnik Cani, ka ngritur dyshimet se autori ka qenë udhëtar në makinën e çekëve, të cilët e kishin marrë nga Dukagjini, për t’iu drejtuar Shkodrës, ndërkohë që mësohet se ka bashkëpunuar edhe me persona të tjerë, që qëlluan me breshëri ndaj automjetit në kohën që ata ishin vrarë brenda.
Burime pranë policisë bëjnë me dije se çifti çek kishin marrë me vete në automjetin e tyre sapo u nisën nga Dukagjini për Shkodër edhe një person, që thuhet të ishte si udhëtar. Nuk dihet ende identiteti i tij dhe as rrethanat në të cilat ai ka hipur në mjetin e çekëve. Pasi kishin bërë pak rrugë, ai i ka qëlluar nga armë në kokë, fillimisht burrin e pastaj gruan. Për këtë në makinë janë gjetur edhe gëzhojat e të shtënave. Pas goditjes, makina ka dalë nga rruga e në këtë kohë autori duket se ka zbritur në rrokullisje e sipër. Ndërkohë që ndaj mjetit janë lëshuar breshëri kallashnikovi nga persona që thuhet të jenë bashkëpunëtorë të autorit.
Në këto mezonet besohet se është plagosur edhe autori, për shkak të aksidentimit të makinës me të cilën ai udhëtonte me viktimat, ndërsa në tentativë për tu larguar, ka lënë në makinë çantën dhe kallashnikovin me të cilin kreu krimin e dyfishtë.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
