Opozita ka braktisur seancën plenare të kësaj të enjteje, pas refuzimit të Partisë Socialiste për të ngritur dy komisionet hetimore të kërkuara prej saj — për çështjen “McGonigal” dhe për zgjedhjet e 11 majit.
Socialistët në Kuvend konfirmuan se nuk do të mbështesin ngritjen e komisioneve, gjë që solli reagimin e menjëhershëm të deputetëve demokratë, të cilët lanë sallën e Kuvendit.
Në një prononcim për mediat jashtë ambienteve të Parlamentit, kreu i PD, Sali Berisha akuzoi Partinë Socialiste se po pengon hetimin për çështjen “McGonigal”, pasi, sipas tij, pjesë e dosjes është vetë kryeministri Edi Rama.
“Pseudo mazhoranca në mënyrën më antikushtetuese i mohoi opozitës të drejtën më themelore, kushtetuese që ka në parlament Komisionin Hetimor parlamentar. E kreu këtë akt edhe pas një beteje të gjatë, disa mujore që u zhvillua në legjislaturën e parë dhe pas vendimit të Gjykatës Kushtetuese që kjo është një e drejtë që nuk mund të preket, një e drejtë e pakicës e patjetërsueshme.
Menjëherë pas largimit nga seanca, Partia Demokratike njoftoi se nesër në orën 12:00 do të zhvillohet një mbledhje e posaçme e Grupit Parlamentar, për të diskutuar situatën e krijuar dhe mohimin e, siç thuhet në njoftim, të drejtave kushtetuese të opozitës.
“Të nderuar kolegë, nesër, e premte, datë 31 tetor, ora 12:00, do të zhvillohet mbledhje e posaçme e Grupit Parlamentar të PD lidhur me situatën e krijuar sot në Kuvend me mohimin e të drejtave kushtetuese të opozitës. Lutem të mos ketë asnjë mungesë për shkak të rëndësisë së mbledhjes”, thuhet në mesazhin drejtuar grupit të PD-së.
Ky është reagimi i parë pas refuzimit për ngritjen e komisioneve hetimore, por Berisha paralajmëroi se opozita do të ndërmarrë edhe veprime të tjera, duke mos përjashtuar as protestat.
Në seancën e sotme plenare, deputeti i Partisë Socialiste Bledi Çuçi ka komentuar kërkesën e opozitës për ngritjen e një komisioni hetimor parlamentar për çështjen McGonigal, ku theksoi se pavarësisht dakordësisë për shqyrtimin e kërkesës, dokumenti i paraqitur nuk përmbush kriteret ligjore të përcaktuara nga Gjykata Kushtetuese.
Ai u shpreh se komisoni hetimor për McGonigal nuk mund të ngrihet, pasi sipas tij Kuvendi i Shqipërisë nuk ka juridiksion për të hetuar procese penale të mbyllura nga drejtësia e SHBA-ve.
Edi Rama përmendet 13 herë në aktin e hetimit të ish shefit të FBI në New York. a.b
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
