Po cilësohet si “rruga që nuk po përfundon kurrë”. Ka një dekadë nga koha e fillimit të punimeve.
Por ndërsa aty prapë po punohet, në hyrje të tunelit kanë nisur çedimet e para.
Gunga të vogla gati të papërfillshme po shfaqen në asfalt. Por në një të ardhme jo të largët ato mund të kthehen në rrezik serioz për udhëtarët.
Historia e rrugës Elbasan-Tiranë është e gjatë. Punimet nisën në vitin 2011 në kohën e qeverisë Berisha.
Sipas projektit rruga u nda në tre lote: segmenti 1 Tiranë – hyrje e Tunelit të Krrabës, segmenti 2 Tuneli i Krrabës, segmenti 3 dalje e Tunelit – Elbasan.
Por ndërsa 2 segmentet e fundit përfunduan, segmenti nga rreth rrotullimi i TEG-ut deri në hyrje të tunelit nuk është gati.
Në 6 vitet e fundit ka pasur mjet zhvillimi për këtë segment. Rrëshqitja në fshatin Ibë duket se u bë pengesë kryesore, por edhe mungesa e fondeve.
Janë vendosur disa herë afate për përfundimin e tij, dhe në asnjërin prej tyre projekti nuk u finalizua.
Në Pranverën e vitit të kaluar, në mbledhjen e qeverisë së zhvilluar në Elbasan, Kryeministri Edi rama deklaroi se rruga do të përfundojë në dhjetor të vitit të kaluar, ndryshe ministri Damian Gjiknuri do largohej nga posti. Në fakt ai sot nuk eshte me ministër.
Më 22 janar të këtij viti, segmenti u inspektua sërish nga Kryeministri, i cili deklaroi se në mars të këtij viti do të hapet një nga korsitë. Ndërsa në maj do të përfundojë krejtësisht rruga.
Nga një inspektim i kryer në terren rezulton se njëra nga korsitë është drejt përfundimit dhe po punohet me sinjalistikën. Ndërsa në tjetrën nuk është hedhur asnjë shtresë asfalt, ndonëse në maj duhet të përfundojë.
Për afatet e përfundimit të punimeve askush nuk u prononcua, ndonëse ishte parashikuar që rruga të hapej për Ditën e Verës.
Një nga punonjësit e firmës u shpreh jashtë kamerave se firma nuk ka marrë ende lekët për punimet ndaj nuk pritet që ta dorëzojë rrugën më 14 mars. Dhe kështu odiseja e rrugës që kurrë nuk përfundon, ende vazhdon./abcnews
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
